ဖႜဳံဆုိ္ဒ္ေဖါဟ္လာခုဂ္ခါင္ၟစူး

ဖႜဳံဆုိဒ္ေဖါဟ္လာခုဂ္ခါင္ၟစူး္အု္္ထာ္႓ံင္ယုိ၀္္ေအအင္းဃွဴ႕ေသွ္ယာ့ဍ၀္စာ္႓ုိ၀္ဖႜဳံဆုိဒ္ေဖါဟ္သၤီးအွ္ထံင္ၟမံင္ဂုိ၀္လီးယးဆု္ထင္းထ၀့္
ေခါဟ္လံင္ေခါဟ္ဍာဏွ္ယိက္မူၟလာထ၀့္လင္ေဖါဟ္လင္လီကါင္ဖါထင္းသာေမာ၀္ၟထာ္လီၟခ၀့္ဖါၟထာ္လီခ၀့္ဟွံင္ဖႜဳံဆုိဒ္ဆေဖါဟ္
သီးအးထင္းေ၀့လွ္။ဖႜဳံဆုိဒ္ေဖါဟ္သီးအွ္အးထင္းလု္႓ႜင္စာင္းဖါယာင္ထင္းေဍေမာ၀္ဖါၟဖီ့ဖူ႔ေလ၀္အွ္ဍိင္ေဍမံင္ဂုိ၀္ဆုိဒ္ေဖါဟ္ထုိင္ၟ
တု္ရုဂ္ဆုိဒ္ေဖါဟ္ ကႜာ အးထင္းဏွ္တာၟ ေမာ၀္ၟဖါၟ ဖီ့ဖူ႔သယ္ကု္တ၀္႓းေဖါဟ္လီမု္ဆိင္းၿပာလင္ဖါဏွ္လွ္။

ေ႓့တု္ရုဂ္ဆုိဒ္ေဖါဟ္သယ္လာခုဂ္ဖုိင္ဆု္ဆုိင္ခါ့လု္ဏိင္းလု္႓ႜင္ေဍေဖါဟ္လီသယ္ဟွယ့္ထာင္ကုံ႓ါပူဇၜဆုိင္ဖူ႔ဖီ့၀ီးလာေဍဆု္ဖူ႔ဆု္ဏးသယ္
သုိ၀္ဖႜဳံဆုိဒ္ေဖါဟ္လု္ဖးသီးလု္ဏိင္းလု္႓ႜင္လာခုဂ္ဆု္ဆုိင္ခါ့ဏွ္ ေကာ၀္ကုံေဏ၀္ၟေဖါဟ္လီ ေယွာတ္ထာင္၀ီးလာ ခါင္ၟေဖွ္ထါင္အု္စူး လ၀္မာလုက္အင္းသံင္းဆ၀့္ပ၀္မိင္ေ၀့လွ္။
ကုိ၀္ဏိင္းေဍကုိ၀္ဏိင္းေဍ လာခုဂ္ဖုိင္ဆု္ဆိုင္ခါ့ကုိ၀္ကုံေဏ၀္ၟေဖါဟ္လီေဍာဟ္ေထာဟ္လာ ခါင္ၟကုံေဖွ္စူး လု္ဏိင္းလု္႓ႜင္ လု္ဏိင္းလု္႓ႜင္ဏွ္ ကုိ၀္ေဏ၀္ၟမိင္ေ၀့ လာခုဂ္ခါင္ၟစူး အွ္လင္ေထံ လင္ေဖါဟ္လင္လီအ္ုထ၀္ထ၀္ လင္ေဖါဟ္လင္လီခံင္ၟ႓ုိ၀္ဏါင္းယုိ၀္ဍာ္လွ္။

ဆု္ဆုိင္ခါ့လာခုဂ္ဖိုင္ကုိ၀္ကုံေဏ၀္ၟေဖါဟ္လီေဍာဟ္ေထာဟ္လာခါင္ၟေဖွ္စူးအင္းသံင္းဆ၀့္ပ၀္ လ၀္ဏင္းထင္းေဖါဟ္လီ ဆု္မူ႔လာၟ ရာဓနာၟေဖွ္မိင္ေ၀့အု္ေခါဟ္က်ံင္ လာခုဂ္ခါင္ၟစူးဏွ္ ကုိ၀္ကုံေဖါဟ္လီအင္းသံင္းဆ၀့္ပ၀္ပ် ဍင္းလု္ထီးဏွ္ ထုင္းေထံမိင္ဏီ့ကုဂ္ ကဲထင္းမိင္လာခုဂ္ခါင္ၟစူးမြာဲေ၀့လွ္။

လာခုဂ္ခါင္ၟစူး ေဍာဟ္ေထာတ္ေနာတ္၀း ေယွာတ္၀ီးလာ အင္းသံင္းဆ၀့္ပ၀္ပ်ေ၀့ဍးဏွ္ဟွး---ႃႃပႜဴးလာဟွယ့္ထာင္ဟွယ့္ထာင္ ဟွယ့္ထာင္အွ္လု္ဟွိင္း၊ဟွယ့္ထာင္အွ္ေဍဖူၟ၀ါဲ၊ ဟွယ့္ထာင္အွ္ေဍထီေဍသုိ၀္၊ ဟွယ့္ထာင္အွ္လ္ုဍဳံတု္၀ါန္႔၊ အွ္႓းေခါဟ္လံင္ဆုဂ္လု္ေဃွ၀္၊ အွ္႓းမိင္လကႜာလု္ေဃွ၀္၊ အွ္႓းသြးေခါဟ္လံင့္ထာ္လု္ေဃွ၀္၊ အွ္႓းဍဳံလင့္ဖင့္က်ာလု္ေဃွ၀္၊ ဏယ္မိင္လု္ေဃွ၀္၊ ဏယ္ဖႜဳိ၀္လ္ုေဃွ၀္၊ ဟွယ့္ထာင္အ္ွကုံ၊ ဟွယ့္ထာင္အွ္ရုံ႕ လု္ဟွိင္းလု္ဃွင့္၊ ဟွယ့္ထာင္အွ္ေဍေမာ၀္ၟဖါၟဖူၟ၀ဲါ ကုိ၀္ဆုိ၀္ေဍ ပႜဴးလာဟွယ့္ထာင္ဟွယ့္ထာင္---႗႗
မု္ခါင္ၟစူးဏွ္ဍ၀္ ခြါဖုိင္ဏွ္တါင္လင္ေ၀့ဍး ေမ၀္ထုံဍဴး ႏုဦ႔ဍဴး၊ ေမ၀္အာင္ထံင္ႏုဦ႔႓ံင္း၊ သာကုဲသးႏုဦ႔ဖႜဳံး၊ ဆီ့ေဖါတ္ႏုဦ႔ကုဂ္၊ ဖ၀့္၀ီၟလးႏုဦ႔ထာင္၊ လူးအြာယာင္ႏုဦ႔ယာင္၊ ထီ့လု္ထြယ္ခုံႏုဦ႔မိင္ဏွ္္လွ္။ ခါင္ၟစူးဟွင္ၟ႓းဆူ႔လင္ႏုဦ႔မိင္ဍဳဂ္ပါင္ဏွ္ မြာဲ႓းဏွ္လယ့္စာ္႓ုို၀္ ေကာ၀္ၾကင္ဟု္မႝီဟ္မူးခြါ႔လုက္ဆိင့္လု္ဖး အွ္ေ၀့ဍးမူၟႏုဦ႔မူၟ အု္ေခါဟ္က်ံင္ပါလၜလင္ေ၀့ ဟု္ႏုဦ႔မူး ဟု္ႏုဦ႔ခြါ႔ ႏုဦ႔ဟွာဏွ္လွ္။
ေမ၀္ထုံးဍဴးႏုဦ႔ဍဴး၊ ေမ၀္ထံင္ႏုဦ႔ထံင္သယ္ဏွ္ဍ၀္ မြာဲေ၀့ဍး၀ီ့လာႏုဦ႔ဟွာ ဟု္စာ္ေမံသးဆု္ေသွ္ယာ့-စကၡဳ၀ိညာဏ္၊ ဏာၟဆု္ေသွ္ယာ့-ေသာတ၀ိညာဏ္ၟ ဏါ့ဆု္ေသွ္ယာ့-ဃာန၀ိညာဏ္၊ ႏုိ၀္ေဖႜ၀္ဆု္ေသွ္ယာ့-ဇိ၀ွါ၀ိညာဏ္၊ ဏင့္ဆာၟဆု္ေသွ္ယာ့-ကာယ၀ိညာဏ္၊ သာဆု္ေသွ္ယာ့- မေနာ၀ိညာဏ္၊ သုင္းသာဆု္ေသွ္ယာ့-မေနာ၀ိညာဏဌိတိႏုဦ႔မိင္ဏွ္လွ္။
၁။ ေ႓့ေမ၀္ထုံၟဍဴးအွ္ကုံဆိက္ပႝိက္သုိ၀္၊ ေဖါဟ္လီလု္ဖးအွ္ကုံအွ္ရုံ႔ သၞ၀့္ဃွဴ႕ဃွင္ အွ္တု္တြယ္စူးဆိက္ပႝိက္လာကို၀္ၟ႓ႜင္ေဍ။
၂။ ေ႓့ေမ၀္ထံင္ဏီ့႓ံင္း ကထိက္သာသုိ၀္္ ေမာ၀္ၟထၚဖါၟထၚေဖါဟ္လီဏီ့ခ၀့္လု္ဖး လင္ဖါဆိင္းၿပာလု္ေဃွ၀္၊ အွ္ကာထိက္ကုိ၀ၟ္္ဆုိ၀္ေဍ။
၃။ ေ႓့သာကုဲသးသုိ၀္ ထုိင္ဖူ႔၀ဲါေမာ၀္ၟထာ္ဖါၟထာ္ လု္ဖး အဲကုဲေလာတ္သာ၊ သာကုဲေလာတ္သာ၊ သာထိင္ၟေလာတ္သာ သုင္းသာဆာင္းကၚလု္အွ္ သုင္းသာဆုိင့္လာၟကုိ၀္ၟ္႓ႜင္ေဍ။
၄။ ေ႓့ဆီ့ေဖါတ္သုိ၀္ မဲထင္းလု္ေမံထၚ လင္ေထံလု္အုိ၀္ အု္၀ီၟလင္လု္အုိ၀္ အု္လးထင္း အု္ေဖါဟ္ထင္းေဆ၀္အု္ေဖါဟ္ေဍာဟ္ယွာၟထင္း ဟူၟထင္းေ၀့ကုိ၀္ၟ႓ႜင္ေဍ။
၅။ ေ႓့ဖ၀့္၀ီၟသုိ၀္ ဍိင္ၟယိက္ထင္း ဍိင္္ၟႏုိင့္မုိင့္ထင္းသုိ၀္ ေဖါဟ္လီေမာ၀္ၟထာ္ဖါၟထာ္လု္ဖး ဍိင္ၟယိက္ထင္းလင္ေဖါဟ္လင္လီ ထု္ယ၀္ၟၿပာထာ အု္ရၜႏုိင့္မုိင့္လာၟေ၀့ကုိ၀္ၟ႓ႜင္ေဍ။
၆။ ေ႓့ထီ့ခႜိင္းသုိ၀္ ေဖါဟ္လီ ေမာ၀္ၟထာ္ ဖါၟထာ္သယ္လု္ဖး အွ္ဆံင္းအွ္ခႜါင့္ယွဴးခႜိင္း႓ွ္ယ၀့္လာၟကို၀္္ၟဆုိ၀္ေဍ။
၇။ ေ႓့လူးအြာသုိ၀္ ေမာ၀္ၟထာ္ ဖါၟထာ္ ေဖါဟ္လီလု္ဖး သုင္းသာေဟွ၀္အြာလာၟ ကုိ၀္ဟွာေဍ၊ ဆု္ဖၚဆု္မာလု္အု္ေဟွ၀္အြာဏွ္ မာပၱံင္ကဲလာၟဆာ္ကုိ၀္္ၟဆိို၀္ေဍ။

ေဍာဟ္ေထာတ္ေနာတ္၀း ေယွာတ္၀ီးလာဟွံင္ သုင္းေကသာယွာၟ ေမာ၀္ၟေဍာဟ္၊ မာန္ထ၀့္ဟွာၟထိက္လင္ေဏ၀္ၟလူးယာင္ခြထင္းစူးေခါဟ္ေဆာတ္ဖးရာဓနာၟခါင္ၟေဖွ္စူးဏွ္လွ္။ ႃႃပႜဴးလာဟွယ့္ထာင္ဟွယ့္ထာင္ အွ္႓းေခါဟ္လံင္ဆုဂ္လု္ေဃွ၀္၊ အွ္႓းမိင္လးကႜာလု္ေဃွ၀္၊ အွ္႓းသြးေခါဟ္လု္ေဃွ၀္၊ အွ္႓းလံင့္ထာ္လု္ေဃွ၀္၊ အွ္႓းဍဳံလင့္လု္ေဃွ၀္၊ အွ္႓းဖင့္က်ာလု္ေဃွ၀္၊ ဏယ္ဖႜဳိ၀္လု္ေဃွ၀္၊ ဏယ္မိင္လု္ေဃွ၀္၊ ဏယ့္႓းဏင္ၟလ၀္္လု္ေဃွ၀္၊ ဏယ္႓းဏင္ၟခႜၜလု္ေဃွ၀္၊ ဏယ္႓းခႜဳံးဆာင္းလု္ေဃွ၀္၊ ဏယ္႓းက်ာမာန္လု္ေဃွ၀္၊ ဟွယ့္ထာင္လု္ဍဳံ၊ ဟွယ့္ထာင္လု္တု္၀ါန္္ ဟွယ့္ထာင္လု္ဟွိင္း၊ ဟွယ့္ထာင္လု္ဃွင့္၊ ဟွယ့္ထာင္အွ္ေဍေမာ၀္ၟ၊ ဟွယ့္ထာင္အွ္ေဍဖါၟ၊ ဟွယ့္ထာင္အွ္ေဍဖူၟ၀ဲါ၊ ဟွယ့္ထာင္အွ္ေဍ႓ုဂ္ထိင္ၟဆာင့္ဆာ၊ ဟွယ့္ထာင္ေဍထီသုိ၀္၊ ဟွယ့္ထာင္သုင္းဃွဲဳ႕သာယြာ၊ ဏင့္ဆာၟဆံင္းခႜာင့္၊ အာင္းလုံၟေထံဖါ၊ အာင္းထာေထံ၊ဆံင္းေ႓့ခႜီး ဖႜဳိ၀္ေ႓့ဖႜာၟ၊ ဟွယ့္ထာင္ေဆာတ္ေစ၀္၊ ဟွယ့္ထာင္ေဆာတ္ဓံင့္၊ ဟွယ့္ထာင္ေဆာတ္မႝိက္သိင္လာ့၊ဟွယ့္ထာင္ေဆာတ္ဆု္ေသွ္ဆု္႓း၊ ဟွယ့္ထာင္ဟွယ္ဆု္ဖၚဆု္မာ၊ ဟွယ့္ထာင္ကုက္ကု္လုံ႕ကါင္ကာ၊ ဟွယ့္ထာင္ပၱံင္ဆု္ဖၚဆု္မာ၊ ဟွယ့္ထာင္တာင္ေဍာဟ္ေမာ၀္ၟဖါၟ၊ ဟွယ့္ထာင္တါင္ေဍာဟ္ဟွိင္းဃွင့္၊ ဟွယ့္ထာင္တာင္ေဍာဟ္ဍဳံတု္၀ါန္႔၊ ဟွယ့္ထာင္တာင္ေဍာဟ္အု္ဆုိဒ္အု္ဆ ကဲလာၟေ၀့ဆာ္ကုိ၀္ၟ႓ႜင္ေဍ---႗႗
ပ်ဳင္းေထံခြိက္လူးထုိ၀္ဟွံင္ အင္းမာေဏ၀္ၟ ေမ၀္လု္စယ္၊ ေမ၀္အာင္၊ သာကုဲသး၊ ဆီ့ေဖါဟ္သယ္ ေဍလူးထုိ၀္ဏွ္ ေဆာဟ္ဖးပ်းေ၀့--- ႃႃပ်ဴးလာဟွယ့္ထာင္္၊ဟွယ့္ထာင္အွ္လု္ေခါဟ္ထီးေခါဟ္ဍံင္ယို၀္ ေခါဟ္အြာယင္ၟလူးထုိ၀္႗႗ဍီးထင္းေ၀့ေမ၀္သယ္ ေခါဟ္ဍံင္လံင္ဏွ္ဟွံင္ ခါင္ၟစူးဟွံင္ေ၀့ဍးလွ္။ဖႜဳံဆုိဒ္ေဖါဟ္သီး လု္ဏိင္းလု္႓ႜင္ လာခုဂ္ဖုိင္ကုိ၀္ၟဍဳံတု္၀ါန္႔ေဍ ခါင္ၟကုံစူးေယွာတ္၀ီးလာဆု္ပု္ေယာတ္ဏွ္လု္ဏိင္းလု္႓ႜင္ဍးုကုံေလာဟ္သာေဖါဟ္လီဟွယ့္ ထာင္ကုံဏွ္ အွ္လာၟေအဃွွွွွွဴ႕ဃွင္ အွ္လာၟသုင္းေအေဟွ၀္ သာေအဖါန္ ဆု္ဟွယ့္လ၀္ ဆု္ဟွယ္လယ္ဏွ္ ဏယ္လု္ေဃွ၀္ ပ်းလာၟေမာ၀္ၟဖါၟထူ႔ရူ႕မုင္ၟ႓်ာ ေကႜစိုဒ္ကုက္လာၟကု္လုံ႔ကါင္ကာ ေဍာဟ္ယွာၟထင္းထ၀့္ ယုက္ထ၀့္လာၟ ထံင္သာယွာၟေခါဟ္အြာ အင္းသံင္းဆ၀့္ပ၀္ လ၀္ဟွဳိင့္ေဖါဟ္လီရာဓနာၟေဖွ္ေ၀့မြာဲ႓ုိ၀္လွ္။
ေမာ၀္ၟဖါၟသုင္းေကသာယွာၟလု္ဖး အင္းသံင္းဆ၀့္ပ၀္လ၀္ဟွဳိင့္မာလုက္၀ယ္ ေဖါဟ္လီ စူးေခါဟ္လံင္ခါင္ၟေဖွ္ေဍလူးအြာ လု္ဏိင္လု္႓ႜင္ လာခုဂ္ဖုိင္ကုိ၀္ၟဏိင္းေဍဏွ္ ကဲထင္းေ၀့လာခုဂ္ခါင္ၟစူး လင္ေဖါဟ္လင္လီ အု္ထ၀္ထ၀္ အွ္လင္ေထံေဏ၀္ၟမိင္ေ၀့ ထူရူ႕လု္မိင္ဏွ္လွ္။
စ၀္အဲဆုိဒ္(႓ုံးက္ုုတိက္)